GIZAGAWAN ZUMUNCI

Kungiyar Gizago dai kungiya ce ta zumunci wadda kadan daga cikin manufofinta suka hada da sadar da zumunci tsakanin membobi da kuma farfado tare da inganta al'adun Hausa. 'Yan kungiyar kan fadakar tare da yiwa juna nasiha kan al'amuran rayuwa. Haka kuma sukan taya juna murna ko jaje a yayin da wani abin farin ciki ko akasin hakan ya sami daya daga cikinsu. Suna kokarin farfado da kyawawan al'adun Hausa da ko dai suka bace gaba daya ko kuma wasu bakin al'adun ke neman dusashesu.

Kalmar Gizago dai a Hausance tana nufin wani abin da masassaki ke amfani da shi wajen gudanar da aikinsa na sassaka. Akan yi karin magana da kalmar cewa 'Gizago ba ka da sabo'. Wato duk yadda masassakin nan ya dade yana amfani da gizagonshi, ba zai hana gizagon nan sarar hannun masassakin nan ba in bai sanya kula gami da taka-tsantsan ba.

Ma'anar wannan kalmar a kungiyance kuwa tana nufin tsage gaskiya da yiwa juna nasiha in har dan kungiyar ya yi ba daidai ba, ba tare da la'akari da sabo ba. A kodayaushe dai kokarin 'yan kungiyar shine yadda za a yaukaka dankon zumunci tsakanin juna.

Kungiyar Gizago ta yi taronta na farko ne inda 'yan kungiyar suka sami damar ganin juna ido-da-ido a lokacin da suka tattaru a Kanon Dabo a ranar 26 ga watan Satumba na shekarar 2009. Tun daga wannan lokacin dai lamurran kungiyar sai kara habaka suke, zumunci na kara danko domin kuwa har auratayya ta gudana tsakanin wasu daga cikin membobin kungiyar.

A ranar Lahadi, 5 ga watan Satumba ne Gizagawan Kaduna su ka niki gari

don kai ziyara gami da agaji ga gidajen marayu da nakasassu da ke
Zaria. Ziyarar dai ta sami nasara kwarai da gaske wadda ta gudana
karkashin jagorancin shugaban Gizago na jihar, Mallam Zakariyya Sa'eed
Mai Gwanjo.
Gidan Rainon Marayu gizagawan su ka fara yi wa tsinke inda aka yi musu
cikakken bayanin yadda ake tafiyar da kulawa da wadannan yara, tare
kuma da karin haske a kan yadda ake samun su inda jami'an gidan suka
bayyana cewa wasu daga cikin yaran akan tsince su ne tun suna kanana a
kwararo-kwararo bayan an wurgar da su, yayin da wasu kuma 'yan matan
da su ka haife su ba tare da aure ba kuma ba su son wurgar da su, su
kan kawo su nan gidan don kulawa da su.
A karshen ziyarar dai an mika kayayyakin tallafi da su ka hada da
kayayyakin abinci da suturu don agazawa wadannan yara.
Haka kuma ziyarar ta kasance a Gidan Kula Da Nakasassu da ke
makwabtaka da na marayun duk dai a birnin na Zazzau inda jami'ai suka
kewaya da Gizagawan su ka nuna musu halin da wadannan nakasassu ke
ciki. A wannan gida ne aka nuna wa Gizagawan wani bawan Allah da
sojoji su ka kawo shi gidan tun lokacin yakin basasar kasar nan bayan
da bom ya tashi dab da shi har ya yi sanadiyyar kurumta shi. A wannan
gida kam akwai abubuwan ban tausayi da dama wadanda ka iya sanya mutum
zub da hawaye.
Nan ma dai kamar Gidan Marayu, an mika kayayyakin abinci da suturu da
sauran ababen agaji.